Wax ka ogow Dhaxal sugaha saduudiga maxamed bin salmaan

Home » Taariikh » Caalamka kale » Wax ka ogow Dhaxal sugaha saduudiga maxamed bin salmaan

Last Updated on June 20, 2024 by Taariikh24

Mohammed bin Salman, magaciisa oo  buuxa waa Maxamed ibn Salmaan ibn C/casiis Al Sacuud oo loo yaqaan MBS, wuxuu dhashay Ogosto 31, 1985, xubin ka tirsan qoyska boqortooyada Sacuudiga waana dhaxal sugaha laga soo bilaabo 2017 iyo ra’iisul wasaaraha sacuudiga  2022, Wuxuu sidoo kale soo noqday wasiirka gaashaandhigga 2015 – 2022, Waxaa dhalay Boqorka Sacuudiga Salmaan Bin C/casiis iyo Xaaskiisa saddexaad ee Fahda bint Falaḥ ibn Sulṭān.

Maxamed waa kan ugu weyn lix carruur ah oo ay isku dhaleen Salman bin Abdulaziz iyo xaaskiisa saddexaad Fahda bint Falah Al Hithlain, Kadib markii uu shahaadada sharciga ka qaatay Jaamacadda Boqor Sacuud, waxa uu la taliye u noqday aabihii, Ka dib markii aabihiis Salmaan uu kursiga ku fadhiistay January 2015 waxa uu Maxamed u magacaabay wasiirka gaashaandhigga, waxa kale oo Maxamed bishii April 2015 la siiyay doorka ku xigeenka dhaxal sugaha boqortooyada, Waxa loo dalacsiiyay dhaxal sugaha boqortooyada 2017 ka dib markii la eryay dhaxal sugihii hore Mohammed bin Nayef oo Boqor Salmaan walaalkii dhalay.

Noloshiisii hore

Maxammed yaraantiisii ​​waxa uu xiisaynayay dawladnimada, waxa uu bartay sida loola xidhiidho madax kala duwan loogana fogaado khaladaadka, Waxa uu galay Jaamacadda King Saud University ee magaalada Riyaad ee dalka Sucuudiga, halkaas oo uu kaga qalin jabiyay shahaadada koowaad ee cilmiga sharciga sannadkii 2007, Intaa ka dib waxa uu aasaasay shirkado badan iyo urur aan faa’iido doon ahayn oo loogu talagalay in lagu dhiirrigeliyo hal-abuurka boqortooyada, Sannadkii 2009-kii waxa uu la-taliye rasmi ah uu u noqday aabihiis oo markaas ahaa guddoomiyaha Riyadh, Markii Salmaan uu sare u kacay darajada iyo saameynta, oo uu ugu dambeyntii noqday dhaxal-sugaha 2012, wiilkiisa uu aaminsan yahay ee Mohammed ayaa la kacay.

U xilsaaran difaaca iyo dhaqaalaha

Bishii Janaayo 2015 Boqorkii Sacuudiga Cabdallah ayaa dhintay, Salmaan ayaa noqday boqor, Isla markiiba waxa uu Maxamed u magacaabay wasiirkii gaashaandhigga, Muddo bilo gudahood ah ayuu Maxamed bilaabay faragelin milatari oo la xiriirta dagaalka sokeeye ee Yemen, ololahan ayaa loogu talagalay in lagu siiyo dawladda Yemen ee uu hogaamiyo  Abdrabbuh Mansur Hadi hub iyo taageero ciidan si loo jabiyo kacdoonka kooxda xuutiyiinta shiicada ah ee ka bilowdey waqooyiga dalka.

Waxaa loo malaynayay in guusha Xuutiyiintu ay tahay guusha Iran, si kastaba ha ahaatee, waxa uu ku guul daraystay in uu dagaalka soo afjaro, waxana uu horseeday ismariwaa daba dheeraaday iyo mid ka mid ah dhibaatooyinka bini’aadantinimo ee ugu xun taariikhda casriga ah.

Maxamed waxa kale oo loo dhiibay shirkadda shidaalka dawladda ee Aramco iyo Golaha Dhaqaalaha iyo Horumarinta oo ah hay’adda dejinta siyaasadda aasaasiga ah ee horumarinta dhaqaalaha,  Waxa uu damcay in uu Aramco u furo bandhig dadweyne oo bilow ah (IPO) oo uu dejiyay hindiseyaal horumarineed oo geesinomo leh, sida qorshihiisa Hiigsiga 2030 ee loogu talagalay in uu soo jiito maal-gashi shisheeye,  warshado ka baxsan qaybta tamarta,  Qaar ka mid ah siyaasadahaas ayaa muujiyay hami aad u weyn, si kastaba ha ahaatee. In kasta oo uu filayey in Aramco ay bilawdo IPO-da adduunka ugu weyn horraantii 2017, tallaabada ayaa si isdaba joog ah dib loogu dhigayey illaa dhammaadkii 2019.

Amiirka dhaxalsugaha

Mohammed waxa loo magacaabay dhaxal sugaha bishii Juun 2017 wakhtina iskama lumin sii wadida himilooyinkiisa qaaliga ah, Maalmo yar ka dib waxa uu hormuud ka ahaa go’doomin wadamo badan oo ka dhan ah dowladda Qatar, sababta ma ahayn kaliya mowqifka Qatar ee saaxiibtinimada Iran ee waxa ay sidoo kale Qatar ay taageertay dhinacyada iska soo horjeeda ee aan dawliga ahayn ee gobolka sida Ikhwaanul Muslimiin, In kasta oo go’doominta saddexda sano ah ay Qatar u horseeday dhibaato muddo gaaban gudaheed ah, haddana waddanku wuxuu u adeegsaday hantidiisa inuu dhaqaalihiisa dib u habeeyo si uu ugu tiirsanaado waddamada Khaliijka ee saaxiibka la ah.

Bishii Nofeembar 2017 Ra’iisul Wasaarihii Lubnaan Sacad al-Hariri ayaa si lama filaan ah isku casilay duruufo laga shakiyay isagoo booqasho ku jooga Riyadh, cadaadis weyn oo caalami ah ka dib ayaa Xariri loo ogolaaday inuu ku laabto Lubnaan, halkaas oo uu isla markiiba joojiyay iscasilaadiisa, Duruufaha ka dambeeya dhacdadan yaabka leh ayaa ah mid aan la sheegin, laakiin tuhunnada adduunka wuxuu ahaa Maxamed,  sanad ka dib shir maalgashi markii uu ku kaftamay kaftan ku saabsan afduubka sacad al Hariri.

Isla wakhtigaas oo uu Xariiri iscasilay, waxa la xidhay daraasiin ka mid ah amiirrada Sucuudiga, hoggaamiyeyaasha ganacsiga, iyo saraakiil sarsare, Laakiin maadaama shakhsiyaadka la xidhay ay ahaayeen qaar ka mid ah dadka ugu hantida badan uguna awoodda badan dalka  oo uu ku jiro amiir al-Waleed bin Talal kormeerayaal badan ayaa tuhunsan ujeedada dhabta ah ee xiridda  inay ahayd in awoodda gacanta uu ku dhigo Mohammed, Kuwo badan ayaa la sii daayay ka dib markii ay ka tanaasuleen qayb ahaan maamulida ganacsigooda gobolka ama ay bixiyeen balaayiin doolar, dowladda Sacuudiga ayaa la rumeysan yahay inay ka heshay tallaabadaas in ka badan 100 bilyan oo dollar.

Haweenka waxaa loo oggolaaday inay ka soo qaybgalaan munaasabadaha ciyaaraha, Sannadkii 2018-kii waxa uu si yar u dabciyay xeerka lebiska dadweynaha isaga oo sheegay in aanay dumarku u baahnayn in ay xidhaan ’Abāyah, maro madow oo dheer, Sannadkaas ka dib dumarka waxaa loo oggolaaday inay qaataan shatiga darawalnimada, taasoo u sahlaysa haweenka inay aadaan shaqo ama dugsi.

Bishii Oktoobar 2018 Maxamed waxa lagu eedeeyey dilka Jamal Khashoggi oo ahaa saxafi caan ah iyo nin dhaleeceeya dowladda sacuudiga oo mar soo noqday lataliye iyo kaaliye safiir Sacuudi ah,hawl-wadeennada Sucuudiga ayaa ku soo jiiday Khashoggi qunsuliyadda Sacuudiga ee Istanbul halkaas oo ay jir dil ugu geysteen kuna jarjereen, Madaxweynaha Turkiga Recep Tayyip Erdoğan ayaa hormuud ka ahaa qeylo dhaan ka dhan ah dilka.

Bishii Maarso 2020, markii dunidu ay billowday la tacaalidda cudurka COVID-19, Maxamed wuxuu mar kale xiray xubnaha qoyska boqortooyada Sacuudiga, Waxaa la sheegay in uu ku socdo baaritaan la xiriira khiyaano qaran, dadka la xiray ayaa waxaa ka mid ahaa amiirro aad ugu dhow carshiga oo ay ku jiraan boqor Salmaan walaalkiis  Ahmad iyo Muhammad bin Nayef, dhaxal-sugihii hore ee Maxamed Bin Salmaan uu beddelay.

Dhanka kale, burburka dhaqaale ee ka dhashay masiibada iyo duulaanka Ruushka ee Ukraine ayaa dib u soo nooleeyay maqaamkii Mohammed ee dhaqaalaha adduunka ee 2022, Iyadoo qiimaha saliidda sare u kacdey sicir-bararna uu saameeyay dhaqaalaha adduunka, Erdoğan wuxuu si diiran u qaabilay Maxamed bishii June 2022.

Bishii Sebtembar 2022 waxaa loo magacaabay ra’iisul wasaare oo ah xafiis dhaqan ahaan u ah boqorka oo kormeera Golaha Wasiirrada, Walaalkiis oo ka yar oo lagu magacaabo Khaalid waxa uu u beddelay wasiirkii gaashaandhigga.

Noloshiisa Gaarka ah

6dii Abril 2008 Maxamed waxa uu guursaday ina-adeertiis kowaad Sara bint Mashour oo ah gabadh uu dhalay adeerkiis Mashour bin Abdulaziz, Mohammed iyo Princess Sara waxay leeyihiin shan carruur ah.

Maxamed waxa uu safaro badan ku maray caalamka, isagoo la kulmay siyaasiyiin, hogaamiyeyaal ganacsi iyo dad caan ah, Bishii Juun 2016 wuxuu u safray Silicon Valley wuxuuna la kulmay dadka muhiimka ah ee warshadaha tignoolajiyada sare ee Mareykanka  oo uu ku jiro aasaasaha Facebook Mark Zuckerberg, Horraantii 2018 waxa uu booqasho ku tagay dalka Maraykanka halkaas oo uu kula kulmay siyaasiyiin, ganacsato iyo xiddigo badan oo Hollywood ah kuwaas oo ay ka mid ahaayeen Madaxweynihii wakhtigaas Trump, Bill iyo Hillary Clinton, Henry Kissinger, Michael Bloomberg, George W. Bush, George H. W. Bush, Bill. Gates, Jeff Bezos, Oprah Winfrey, Rupert Murdoch, Richard Branson, Duqa magaalada Los Angeles, Michael Douglas, Morgan Freeman, iyo Dwayne Johnson.

19kii Noofambar 2022 jaamacadda Kasetsart  ayaa Mohammed waxay  guddoonsiiyey shahaado sharafeedka.

Sannadkii 2018, hantida Maxamed waxa lagu qiyaasay US$3.0 bilyan.

Xaqiiqooyin

Magaciisa oo buuxa	Mohammad bin Salman bin Abdulaziz Al Saud
Shaqadiisa	sugaha Boqortooyada Sacuudiga
Dhashay	Ogosto 31, 1985
Ku dhashay	Magaalada riyaad, caasimadda dalka sacuudiga
Heerka waxbarasho	bachelor’s degree in law
hooyadii	Fahda bint Falaḥ ibn Sulṭān
Walaalihiis isku hooyo iyo aabe ay yihiin	Turki, Khalid, Nayef, Bandar, Rakan
Walaalihiis dhinaca abaha	Saud, Sultan, Ahmed, Abdulaziz,  Faisal, Hassa, Fahd
Diintiisa	Islam
Xaaskiisa	Sara bint Mashour Al Saud